Ejo kaj loko

Loko

BET-60 okazos en Rigo – la ĉefurbo de Latvio. La urbo situas ĉe la suda marbordo de la Riga Golfo de la Balta Maro. La historia centro de Rigo situas ĉe la dekstra bordo de la rivero Daŭgavo, proksimume 10 km de ĝia enfluejo en la Rigan Golfon. Distanco de la plej proksimaj eŭropaj ĉefurboj laŭ aŭtovojoj: Vilnius – 300 km, Tallinn – 310 km, Helsinki – 400 km, Stokholmo – 550 km, Varsovio – 660 km, Berlino – 840 km. La antikva urboparto de Rigo estas registrita en la listo de la Monda Kulturheredaĵo de Unesko. Rigon oni nomas la metropolo de secesia stilo (Art Nouveau, Jugendstil), ĉar en ĝia centra parto proksimume 40% el ĉiuj domoj estas secesi-stilaj konstruaĵoj, kio estas multe pli ol en aliaj eŭropaj urboj.

BET-ejo

Riga Teknika lernejo pri turismo kaj kreiva industrio (latvalingve: Rīgas Tūrisma un radošās industrijas tehnikums), strato Nīcgales 26, Rigo.

Atingeblecoj

Rigon eblas atingi buse, trajne (el Tallinn kaj Vilnius) kaj aviadile. La flughaveno provizas flugojn en pli ol 100 itineroj, ĝi situas 10 km de la urbocentro.