Baltiaj Esperanto-Tagoj 2026

Latvia Esperanto-Asocio invitas Vin partopreni la 60-ajn Baltiajn Esperanto-Tagojn (BET-60) – la plej popularan Esperanto-aranĝon en Baltiaj landoj, la aranĝon kiu havas jam pli ol 60-jaran historion (la unua BET okazis en 1959 ĝuste en Latvio).

4-a ĝis 11-a de julio 2026
Rigo, Latvio

Loko

BET-60 okazos en Rigo – la ĉefurbo de Latvio. La urbo situas ĉe la suda marbordo de la Riga Golfo de la Balta Maro. La historia centro de Rigo situas ĉe la dekstra bordo de la rivero Daŭgavo, proksimume 10 km de ĝia enfluejo en la Rigan Golfon. Distanco de la plej proksimaj eŭropaj ĉefurboj laŭ aŭtovojoj: Vilnius – 300 km, Tallinn – 310 km, Helsinki – 400 km, Stokholmo – 550 km, Varsovio – 660 km, Berlino – 840 km. La antikva urboparto de Rigo estas registrita en la listo de la Monda Kulturheredaĵo de Unesko. Rigon oni nomas la metropolo de secesia stilo (Art Nouveau, Jugendstil), ĉar en ĝia centra parto proksimume 40% el ĉiuj domoj estas secesi-stilaj konstruaĵoj, kio estas multe pli ol en aliaj eŭropaj urboj.

BET-ejo

Riga Teknika lernejo pri turismo kaj kreiva industrio (latvalingve: Rīgas Tūrisma un radošās industrijas tehnikums), strato Nīcgales 26, Rigo.

Provizora programo

Diversnivelaj Esperanto-kursoj, Somera Universitato, vasta kultura programo, duontagaj kaj tuttagaj ekskursoj, kvizoj, kantoj, dancoj k. a. aranĝoj.
Kontribuoj al la programo estas atendataj kaj bonvenaj.

Kotizoj

Vidu apartan paĝon (Kotizoj en la maldekstra menuo).

Loĝado

En la studenta hotelo de la Teknika Lernejo (strato Nīcgales 26):
  •  po 30 € diurne por persono en dulita – kvarlita ĉambro (duŝejo kaj necesejo por du ĉambroj);
  •  po 45 € diurne por persono sola en dulita – kvarlita ĉambro (duŝejo kaj necesejo por du ĉambroj). 

La prezoj estas provizoraj kaj povas ŝanĝiĝi.

En hoteloj de Rigo (rezervado memstara).

Manĝado

Estos organizita matenmanĝo kaj tagmanĝo, informo pri la prezoj en la Informilo No 2.

Aliĝo

Prefere aliĝu rete:
Reta aliĝilo           ► https://www.esperanto.de/bet-aligho
Listo de aliĝintoj  ► https://www.esperanto.de/bet-partoprenantoj

aŭ plenigu la aliĝilon kaj sendu al:  margarita.zelvegmail.com

Samtempe pagu la aliĝkotizon (paĝo Kotizoj). 

Atingeblecoj

Rigon eblas atingi buse, trajne (el Tallinn kaj Vilnius) kaj aviadile. La flughaveno provizas flugojn en pli ol 100 itineroj, ĝi situas 10 km de la urbocentro.

Kontakteblecoj 

  •  rete:         betesperanto.de
                       margarita.zelvegmail.com

 •  telefone:  +371 26407174 (Margarita)