En mardo, la 8-a de februaro, vizitis nian klubon en Duisburg la brazila studento Paulo Félix el Fortaleza, la ĉefurbo de la nordorienta provinco Ceará. Duisburg estis la lasta stacio de lia ok-semajna prelegvojaĝo tra Eŭropo, kiu okazis kadre de interŝanĝprogramo de Cearaa Esperanto-Ligo.
Paulo regalis la aŭskultantojn per du prelegoj. Unue li prezentis sian hejmlandon Brazilon
el multaj perspektivoj per interesaj bildoj. Tiun unuan parton finis profesinivela turisma varbofilmo por Ceará, farita plene en Esperanto. En la dua prelego ni eksciis, kiel ekestis la nacia lukto-arto Kapoejro (Capoejra) el la kulturo de sklavoj. Ni ne nur lernis, ke temas samtempe pri luktado, dancado, akrobatiko, sporto, kulturo, eĉ vivo-filozofio; - Paulo eĉ surprizis ĉiujn per praktika, akrobata prezento de diversaj movoj de tiu ĉi unika fenomeno.
Lia vizito certe restados en la memoro de la publiko.

Lars Sözüer, Duisburg