|
Plej gravas kion volas kaj faras vi,
|
|
kara leganto. Kiel imagi la estontecon de asocioj, kies membrokunvenojn partoprenas preskaŭ nur estraranoj? Feliĉe tiuj je la 10a de februaro ne rezignis, sed preparis la estontan laboron. Laboro kiu realigeblas ĉiukaze nur per pli da fortoj.
Kompreneble ekzistas plej diversaj personaj kaŭzoj de deteno. Certe tago ekster la lernejaj ferioj estus pli taŭga. Eblas, ke la longa tagordo de du sinsekvaj kunsidoj efikis fortimige.
Tamen, ke ĉeestis entute nur 14 personoj, kaj do en la nuna jaro la vorto "ĉefkunveno" fakte estas interpretebla per "kunveno de la ĉefoj", tio estas alarma signo kaj provokas aron da pripensindaj demandoj.
Jen nur kelkaj: Kiuj el la kutimaj aranĝaĵoj estas ŝatataj kaj kiel atingi pli larĝan partoprenon? Kion aldoni, ŝanĝi aŭ ĉesigi ? Kiujn klare konturitajn celojn en pli longa perspektivo alstrebu EABB kaj ELB? Kiel la estraranoj sukcesos varbi kaj entuziasmigi pli da kunlaboremuloj? Ĉu eblas kalkuli je la aktivuloj "de hieraŭ" ?
Dum la sekvaj semajnoj kaj monatoj urĝe necesos pripensi kaj priparoli ĉion ĉi. Ne hezitu komuniki viajn ideojn kaj proponojn, viajn demandojn kaj kritikojn. Okazoj estas ĉiam (vidu al la kalendaro), ankaŭ en la dissendolisto kaj en la Esperanto-Informilo.
Kaj, bonvolu pardoni la ripeton; plej gravas ...
|
|
Esperanto-Ligo Berlin decidis pri statutoŝanĝo
|
|
La jarĉefkunveno de Esperanto-Ligo Berlin decidis ŝanĝi la paragrafon 3 de sia statuto: la oficperiodo de la estraro anstataŭ unu de nun estu du jaroj (en kongruo kun Esperanto-Asocio Berlino-Brandenburgio). Tio donu al la elektita estraro la eblon al pli kontinua laboro kaj evitigu la neceson de tro ofta serĉado de novaj kandidatoj.
La elektoj rezultigis malmultajn ŝanĵojn: prezidanto estas denove Peter Kühnel, vicprezidanto Fritz Wollenberg, kasisto Ulrich Wilke, sur la posteno de sekretario alternas Gerd Bussing kaj Hans Moser. La plendokomisionon konsistigas d-ro Joachim Rohde kaj Peter Bäss, kasrevizoroj restis Helmut Krone kaj Ulrich Bungenstock.
La lastjara Ligo-buĝeto estis ŝarĝita per eksterordinare altaj elspezoj por la Espoteko kaj gravaj aranĝoj. Tio supozeble ne ripetiĝos dum la sekvontaj jaroj.
La ankoraŭ ekzistantaj berlinaj grupoj, spite al diversaj malhelpoj kaj ŝanĝoj, ja povis daŭrigi sian laboron. La grandparte modestan viziton de la aranĝoj kaj precipe la ŝrumpadon de la membraro oni tamen konsideris zorgiga signo. La kunveno konsentis, ke necesas decidaj elpaŝoj al varbado kaj akiro de novaj membroj. Por tio novaj kaj de ni efektivigeblaj ideoj estas bezonataj.
Gerd Bussing
|
|
Jarkunveno de la Esperanto-Asocio Berlin-Brandenburgio
|
|
La 10an de februaro jam je la 14-a horo renkontiĝis 3 el la plej viglaj esperantistoj de Brandenburgio en "Regenbogenhaus" (Berlino) por partopreni en la ĉefa jarkunveno de ELB, por diskuti pri la diversaj temoj ene de la programo, por observi la balotojn de la estraro kaj de la diversaj komisionoj kaj por demonstri la fortan ligon al la plej granda kaj aktiva suborganizo de EABB.
Post ioma malfruiĝo ankaŭ okazis la aranĝo de EABB, bedaŭrinde nur en la sama kadro kiel antaŭe.
Evidentiĝis, ke la vojo al Berlino pro la eble tro malfrua komenciĝo kaj la netolereble longaj vojaĝoj per publikaj transportiloj malhelpis la ĉeeston de pliaj brandenburgianoj. Danke al la berlinaj geesperantistoj tamen ĉeestis sufiĉe da membroj dum la baloto por la estraro de EABB.
Por la parto de Esperanto-Asocio Berlin-Brandenburgio restis la sekvaj gravaj decidoj kaj programeroj:
|
|
Varankin-prezento je la unua de majo en Neukölln
|
|
Kun la kleriga asocio SALZ e.V. mi interkonsentis, ke ni prezentu la verkon de Varankin okaze de la ĉi-jara unua de majo en Neukölln en la proksimeco de Hermannplatz, kie en la jaro 1929 okazis "Blutmai" (Sanga majo). La preciza dato supozeble estos vendredo, la 27a de aprilo. Gastigos la eventon la socia centro "LUNTE" en Weisestraße 56 (proksime al la metrostacio Boddinstraße).
Okazos legado de mia traduko germanlingva, tamen oni povos informi ankaŭ pri Esperanto kaj la rolo de internacia lingvo en laborista movado. Certe eblos atentigi pri ligoj al Esperanto-Platz.
Mi petas vin subteni ĉi tiun aranĝon laŭ viaj kapabloj: Legado de teksto, muziko, tekniko, rusa manĝo ktp.
Kiu ne scias pri kio temas, povas ricevi PDF-dosieron de la broŝuro,kiun mi produktis 2001.
Roland Schnell
|
|
Forpasis nia granda mecenato Erich Magdanz
|
|
Ni nur nun eksciis, ke la 20an de novembro 2006 forpasis Erich Magdanz, eks-berlinano, donacinto de la Esperanto-domo Michendorf, en sia domo en Bad Alexandersbad (Bavario), en la aĝo de 95 jaroj.
Erich Magdanz naskiĝis en Potsdam en 1911. Instigite de lia patro, li en 1923 eklernis Esperanton ĉe la muzikinstruisto Heinrich, patro de la konata berlina Esperantisto Werner Heinrich. Fine de la dudekaj jaroj li konatiĝis kun pluraj aliaj esperantistoj, pliperfektiĝis en la lingvo per Cseh-kurso, iĝis SAT-membro kaj komencis korespondadon kun eksterlandaj samideanoj. Elektinte la profesion de aŭtomobil-konstruisto, li krome kleriĝis en matematiko, stenografio kaj teknika desegnado. Li lernis la gitar- kaj mandolinludadon kaj fariĝis aktiva ĥorkantisto.
En 1935/36 li estis plurfoje arestita pro suspekto de kontraŭleĝaj kontaktoj al eksterlando. La militfinon li travivis kiel usona militkaptito en Francio.
En 1947 Erich Magdanz aliĝis al SED, sed jam post kelkaj monatoj estis eksigita pro nekonformeco. Sekvis daŭra kontrolado de liaj korespondaĵoj kaj pluraj arestoj.
En 1952 li translokiĝis al Okcidenta Berlino, kie li laboris kiel evolu-inĝeniero en granda firmao. Dum la sekvaj jardekoj li kun sia edzino Ruth daŭre aktivis en la Esperanto-movado.
Komence de la 1990aj jaroj li sukcese lanĉis monkolektadon por malriĉaj rusaj esperantistoj kaj mem flugis al Moskvo por transdoni la monon. Entuziasmiĝinte pri la ideo de la "Eŭropa Domo", li en la sekvantaj jaroj ellaboris multpunktan proponaron, kiel plibonigi pere de Esperanto la rilatojn inter la eŭropaj nacioj kaj pozitive influi la politikon kaj ekonomion. Tiu ci ellaboraĵo bedaŭrinde trovis nur malfortan eĥon.
En 1996 lia domo en Potsdam-Michendorf dum solena festo estis transdonita al la esperantistoj. La plano de Erich, plukonstruigi la domon al granda internacia renkontiĝejo, ne povis plene efektiviĝi.
En 1998 li invitis aron da berlinaj kaj potsdamaj esperantistoj al "vivadiaŭa festo" en Bad Alexandersbad. Apud la estonta tombo de la geedzoj okazis ceremonio, kies programon li detale fiksis. Grandanime li pagis al la kun-festantoj ĉiujn kostojn de vojaĝo kaj restado.
Erich Magdanz, kiu nur malofte emis paroli pri sia eventoriĉa vivo, ĉar laŭ li "la estonteco estas pli grava ol la pasinteco", tamen plurfoje rakontis, kiel ĉe tute hazarda renkontiĝo li havis la okazon informi la faman Albert Einstein pri Esperanto.
Gerd Bussing
|
|
Esperantisto estos kandidato ĉe Harald Schmidt
|
|
En la revekita serio "Psst" de Harald Schmidt aperos en la televidokanalo ARD je la 6a de marto 2007 ekde 18a horo kaj 50 esperantista kandidato, kies "enigmon" divenu eksperta teamo (Partoprenos pluraj kandidatoj.)
Ne maltrafu tiun amuzaĵon.
Dr. Rudolf Fischer
|
|
Pola Radio: ĉiutage 20-minuta programo en Esperanto
|
|
Lunde la 8-an de januaro estis dissendita la lasta tradicia elsendo de Pola Radio en Esperanto. Ekde la 9a de januaro eblas aŭskulti tempe iom reduktitajn elsendojn per podkasto, kiu funkcias per la adreso www.polskieradio.pl/podcast/39/podcast.xml.
Podkasto estas relative nova maniero sendi radiajn programojn (aŭ ĝenerale son-dosierojn) trans la reto. Uzantoj abonas podkastojn per aparta programo, kiu aŭtomate serĉas novajn eldonojn de la elsendoj.
Laŭdezire tiu programo povas ankaŭ aŭtomate kopii la aktualajn elsendojn el la reto. Tiamaniere novaj eroj de la radioprogramo estas aŭskulteblaj per la hejma komputilo senprokraste. El la komputilo vi povas transmeti ilin al porteblaj son-reproduktiloj, taŭgaj por mp3-dosieroj.
Popularaj programoj por aŭskulti podkastojn estas ekzemple Doppler (por Windows) kaj iTunes (por Macintosh kaj Windows). Por aŭskulti la podkaston necesas unue instali unu el tiuj programoj en la komputilo. Poste oni per tiu ĉi programo povas aboni la elsendon.
Novaj eldonoj de la elsendo aŭtomate aperos en la komputilo, kiam ili estos haveblaj.
La enhavo de la elsendoj de Pola Radio en Esperanto ŝajne ne ŝanĝiĝis draste, kvankam la nova Esperanto-redakcio konsistas nun el nur unu dungito, sinjorino Gabi Kosiarska.
En la unua elsendo laŭ nova formo ŝi diris interalie: "Kvankam nia programo nun funkcias en la nova strukturo de Pola Radio, nome la direkcio de novaj amaskomunikiloj, kaj ne plu kadre de la poreksterlanda programo de Pola Radio, ĝia tasko restas senŝanĝa: informi vastskale esperantistan aŭskultantaron en la mondo pri Pollando kaj pri ĝiaj aferoj..."
La esperantlingva retejo de Pola Radio en Esperanto reaperis, kun nova formo kaj nova adreso. (www.polskieradio.pl/eo.)
Laŭ Libera Folio
www.liberafolio.org
|
|
Ulrich Becker eldonos la novan literaturan periodaĵon "Beletra Almanako"
|
|
En aŭtuno 2007 startos nova literatura periodaĵo, kiu komence aperos unufoje jare (poste eble dufoje). Ĝia nomo estos Beletra Almanako. Redaktos Jorge Camacho (ĉefredaktoro), Probal Daŝgupto kaj István Ertl (redaktoroj). La eldonadon prizorgos la novjorka eldonejo Mondial, kiun fondis la eks-berlinano Ulrich Becker. La iniciatintoj de Beletra Almanako jam interkonsentis kun Universala Esperanto-Asocio pri tio, ke la gajnintaj kontribuaĵoj al la Belartaj Konkursoj, kiuj antaŭe aperis en Fonto, estonte legeblos en Beletra Almanako.
La nova eldonaĵo enhavos poezion, prozon fikcian kaj nefikcian, eseojn, recenzojn, leterojn, intervjuon kaj debaton. Aperos kontribuoj kaj originalaj kaj tradukitaj. Oni akceptos materialon, kiun la aŭtoroj verkis speciale por la almanako, sed bonvenaj estos ankaŭ altkvalitaj tekstoj jam pli frue aperintaj en la reto - sed ne surpapere.
La decidon pri la apero-ritmo komentas Jorge Camacho tiel: "por esti realismaj, ni preferas komenci per almanako senpretenda ... ol per tradicia monata aŭ du-monata revuo".
Pri la ekonomia perspektivo diras Ulrich Becker: "Feliĉe, ĝis nun ĉiu kontribuanto ... laboras senpage por Beletra Almanako (kaj tamen la aŭtoroj ricevos senpagan ekzempleron). Se, ekzemple, 20 aŭtoroj plus la redaktora teamo ricevas senpagajn ekzemplerojn, necesas proksimume 90 aĉetantoj por almenaŭ kovri ĉiujn elspezojn. La fakto ke UEA aĉetos ekzemplerojn por la BK-gajnintoj, kaj espereble ankaŭ mendas por la libroservo, multe helpas. Kaj la unuaj individuaj antaŭmendoj jam alvenis. Krome - la eldonejo ankaŭ daŭrigos la entreprenon eĉ se en la unua jaro ni havos etan deficiton".
Laŭ Libera Folio www.liberafolio.org
|
|
Esperanto-urbo Herzberg am Harz meritas vian viziton
|
|
Intertempe jam disvastiĝis la novaĵo ke la urbo Herzberg ekde la pasinta somero oficiale uzas la titolon "Herzberg am Harz - die Esperanto-Stadt", por prezenti sin en turisma medio kaj en la interreto. Tamen tio estas nur la "krono" de longajara celkonscia laboro.
La engaĝiĝo de la hercberganoj por translima interkompreno kaj la jamaj atingaĵoj de la esperantistoj de Esperanto-Gesellschaft Südharz estas vere io unika kaj ekzemplodona.
Vi ekscios pli en venonta numero de Esperanto-Informilo. Sed, ke Herzberg nepre indas je vojaĝo, pri tio konvinku vin prefere surloke per propraj okuloj!
Kial ne kapti ĉe la kapo du okazojn samtempe? Ferian semajn(fin)on en trankvila urbo ĉe la piedo de la Harc-montaro eblas kunligi kun esperantumado en la Interkultura Centro Herzberg. Tie atendas vin kompetentaj fakuloj, biblioteko, arkivo kaj plej diversaj programeroj kun internacia publiko. Sume dirite; atendas vin duobla ver(d)a travivaĵo.
Hoteloj, pensionoj kaj feriaj loĝejoj situas tre proksime de la Esperanto-centro kaj ofertas tranoktojn je favoraj prezoj. ICH volonte peras gastigantojn kaj mem disponigas limigitan nombron de tranokteblecoj al "dormosakuloj".
Abundajn informojn pri la historio kaj turismaj vidindaĵoj de la urbo kaj ties ĉirkaŭaĵo vi trovos en la retejo de Herzberg (www.herzberg.de), nun jam ankaŭ en Esperanto. Sube vi vidas la datojn de la plej proksimaj ofertoj de ICH, sed ĝia slogano validas ĉiam: venu, vidu, spertu!
El la programo de Interkultura Centro Herzberg (vidu www.ic-herzberg.de/esperanto)
Telefono: 05521-5983
Grubenhagenstraße 6
Telefono: 05521-5983
e-poŝto: esperanto-zentrum@web.de
Telefono: 05521-5983
37412 Herzberg - die Esperanto-Stadt
|
|
