Tempo: 16a de februaro, 14a 30h
Loko: Gemeindehaus der evangelischen Kirche Zum Heilsbronnen Heilbronner Straße 20, 10799 Berlin-Schöneberg (proksime al la metrostacio Bayerischer Platz)
 
Programo:
 

La ĉi-jara membrokunveno donas okazon por promene konatiĝi kun placo kies historio komencis kiam Schöneberg ankoraŭ estis memstara urbo ekster la limoj de Berlino. Unue la nomo de la placo estis nura litero; Y. Poste ĝi ricevis la nomon Bayrischer Platz omaĝe al la tiama reĝolando Bavario.
 
En la jaro 1908 laŭ plano de Fritz Enke en la mezo de la placo okazis la aranĝo de pentrinde bela parketo kun gazonaj areoj, florbedoj, arboj, heĝoj, fontanoj kaj lignaj benkoj. Ekde 1909 oni skribas Bayerischer Platz. La randon de la placo formas konstruaĵoj en historiisma stilo. Ili ekestis laŭ komisio de asocio por evoluigo de konstruterenoj, kies nomo estis Berlinische Bodengesellschaft. Je la unua de decembro 1910 la placo ricevis metrostacion kun la sama nomo.
 
Ĉe la placo kaj en ties proksima ĉirkaŭaĵo vivis multaj artistoj kaj intelektuloj. Bayerischer Platz 1 estis la adreso de Erich Fromm. En distanco de nur kelkaj paŝoj loĝis Gottfried Benn (Bozener Straße 20), Eduard Bernstein (Bozener Straße 18), kaj Arno Holz (Stübbenstraße 5). Ankaŭ Albert Einstein hejmis proksime. Granda estis la nombro de judaj loĝantoj. Unu el ili, Benedikt Lachmann, en 1919, fondis la librovendejon Buchladen Bayerischer Platz. Inter liaj klientoj estis Einstein, Benn kaj Curt Riess. Post per- sekutado kaj deporto Lachmann mortis 1942 en la pola urbo Lodz. La librovendejo ankoraŭ ekzistas. Bombadoj kaj incendioj de la Dua Monda Milito dezertigis la parkaĵon kaj ankaŭ multajn el la konstruaĵoj ĉirkaŭ la placo.
 
En februaro de la jaro 1945 du aviadilaj bomboj, trafante la metrostacion dum tie haltis du trajnoj, mortigis 63 homojn. Poste la stacio fakte ne plu estis subtera - ĝi restis preskaŭ tute sen kovraĵo! Post forigo de la ruboj sur la areo de la placo staris nenio krom gazetkiosko. 1956 okazis rektigo de Grunewaldstraße. Ekde tiam la strato distranĉas la sudan parton de la placo. Por ebligi tion okazis malkonstruo de pavilono kon-dukanta al la stacio. Anstataŭis ĝin komplete aliforma enirejo.
 
Fine en 1971 ekestis la nuna senornama konstruaĵo kiel aliro al la tiam nova kruciĝo de la linioj U4 kaj U7. Ili ligas la placon rekte kun la kvartaloj Spandau, Charlotten-burg, Wilmersdorf kaj Neukölln. Kontraste la norda enirejo transvivis ĉiujn ŝanĝojn en la formo de 1910. La postmilitaj breĉoj en la konstruaĵaro de la placo repleniĝis en la jaroj 1956 ĝis 1958. La parkaranĝon de la placo oni re- konstruis en tre simpligita formo kun akvobaseno kaj kvar fontanoj.

Plej impresa dum la Novjara Renkontiĝo (NR) estas eble la granda kvanto de infanoj kaj junuloj ĝis 16 jaroj. Ĉi-foje, al la 6-a NR, organizita de EsperantoLand, venis 56 da ili, kiuj dividiĝis en diversajn laŭaĝajn subgrupojn - estis la rondo de 14- ĝis 16-jaruloj, plejparte denaskaj, estis grupo laŭaĝe iomete sub tiu, kiu vagadis tra la domo ĉiutage produktante kelkminutan filmeton, estis teatra grupo, kiu fine surscenigis teatraĵon kaj estis pliaj grupoj de infanoj, kiuj manlaboris, kreis bestojn, pentris, desegnis, dancis, aŭskultis fablojn, parto-prenis en safaria luda posttagmezo, konkursis tablotenise, ludadis aŭ ekskursis al naĝejo. Ĉio ĉi sub la sperta gvidado de Christoph kaj Ines Frank, kiuj kun deko da helpantoj aranĝis tion. Se juĝi laŭ la vizaĝoj ĝojaj dume (kaj larmetaj fine), la semajno multe plaĉis al la infanaro kaj junularo.
 
Sed, infanoj kaj junuloj de tiu aĝo ne venas solaj - ĉeestis inter la entute 139 partoprenantoj el 13 landoj ankaŭ okdeko da plenkreskuloj, sufiĉe por ĝui interesajn interparolojn kaj povi bone amuziĝi. Al tio kontribuas certe ankaŭ la fakto, ke NR estas bele internacia kaj germanoj jam delonge estas malplimulto: tri kvaronoj de la partoprenantoj venas el eksterlando, de Ottawa en Kanado ĝis Novosibirsk en Siberio, de Norvegio ĝis Hispanio; el pluraj landoj venis po kelkaj, dudeko ĝis trideko el la najbaraj landoj Belgio, Francio kaj - bela surprizo - 19 homoj el Svislando, kie Esperanto ŝajne iom reviviĝas.
 
Ĉi-jare okazis Magia Vespero, en kiu ok sorĉistoj prezentis diversajn magiaĵojn, ĵongladon, kreis balonajn bestojn, estis alivestitaj kiel gigantoj kaj fine kovris la scenejon kaj grandan parton de la salono per (artefarita) neĝo - je la grandega amuziĝo de la infanaro. (Jes, ankaŭ polvosuĉiloj povas efiki magie...) En alia vespero JoMo bele koncertis por ni kaj entuziasmigis la aŭskult-antaron. Krome estis Luda, Teatra, Muzika kaj Internacia Vesperoj kaj kompreneble kiel kulmino la Silvestra Festo en pluraj salonoj de unu el niaj domoj.
 
Okazis interalie prelegoj pri Vikipedio, Linukso kaj pri la nova eŭropa referenc-kadro pri lingvoj, lumbildprelegoj pri mondvojaĝo kaj pri Japanio, diskuto pri trafika politiko, kurso pri tridimensia desegnado kaj pri Salsa-dancado, rondo por malstreĉiĝemuloj kaj por Jogo-ŝatantoj - kaj kompreneble lingvaj kursoj kaj konversaciaj rondoj. Ni ekskursis al pluraj najbaraj urboj kaj vilaĝoj, jen piede, jen aŭte aŭ trajne, por viziti regionan muzeon, bierfarejon, malnovan urboparton, kastelruinon kaj monakejon aŭ simple ĝui la naturon kaj arbaron. Dumtage kaj vespere funkciis la kafejo, kiun sperte gvidis Helmut Klünder kun helpo de Gunter Neue kaj Danka Leyk.
 
Pri la renkontiĝo aperis diversaj artikoloj en la regiona gazetaro, antaŭe kaj dume. Krome la germana novaĵagentejo dpa estis tiom afabla publikigi artikolon, el kio rezultis krom kelkaj regionaj represoj ankaŭ intervjueto en la tutgermana gazeto Süddeutsche Zeitung aperanta en Munkeno.
 
Agrable pasis semajno. Feliĉe jam prepariĝas la postaj renkontiĝoj por EsperantoLandanoj - la 5a SOMERE de la 1a ĝis la 17a de aŭgusto kaj la 7a NR fine de 2008, verŝajne en Frankfurto/Majno.

Lu Wunsch-Rolshoven
www.esperantoland.org/de/

Promesplenaj informoj atingas nin el la urbo de la 94-a UK. Tadeusz Truskolaski, la urbestro de Bjalistoko, jam multe aktivis, por ke en la jaro 2009 la Universala Kongreso okazu ĝuste en tiu urbo kie antaŭ 150 jaroj naskiĝis Ludoviko Lazaro Zamenhof.
 
Jam en la lasta somero la urbestraro oficiale alvokis al kampanjo por kolekti subskribojn favore al la kongreso. Poste Tadeusz Truskolaski veturis al la Universala Kongreso de Esperanto en Jokohamo. Tie, alparolante en Esperanto, li invitis la kongreson al Bjalistoko kaj promesis, ke la urbo vaste apogos la organizajn laborojn.
En decembro 2007 startis ampleksa informa kampanjo pri Bjalistoko kiel Urbo de Esperanto. Tiam, lige kun la 8-aj Bjalistokaj Esperanto-tagoj, d-ro Louis-Christophe Zaleski-Zamenhof, nepo de Ludoviko Lazaro, iĝis honora civitano de Bjalistoko.
 
Nun oni preparas la plej intensan fazon de la informa kampanjo, kiu ekos en julio. Okazos interalie surstrataj eventoj, renkontiĝoj, estos afiŝoj kaj tendo de toleremo sur centra placo de la urbo.
Septembre 400.000 legantoj, de la landa eldono de Gazeta Wyborcza ricevos kompaktan diskon. En luda formo ĝi instruos Esperanto kaj prezentos ankaŭ nian movadon al la pola publiko. La urbo Bjalistoko pagos la informan kampanjon kaj la eldonon de la disko el sia buĝeto.
 
Laŭ la planoj en julio 2009, ĝustatempe por la Universala Kongreso de Esperanto, okazos malfermo de nova Esperanto-centro en Bjalistoko. Jure ĝi estos urba institucio, kio signifas, ke la urbo daŭre financos ĝin. Lige al tio Ela Karczewska, kiu prezidas la Bjalistokan Esperanto-Societon, turnas sin al vi per la sekva mesaĝo:
 
La urbo Bjalistoko alprenis decidon proprakoste renovigi la historian konstruaĵon ĉe la strato Warszawska 15 kaj destini ĝin por la sidejo de Esperanto-Centro je la nomo de Ludoviko Zamenhof.
 
Laŭ la plano la objekto iĝu preta kaj ekipita ĝis la 25-a de julio 2009.
 
La Esperanto-Centro konsistos el tri fakoj:

1. Zamenhof-Muzeo
2. Eduka kaj Kultura Centro
3. Centro pri Esploroj de Kultura kaj Lingva Komunikado

Kontaktu nin uzante la adreson:
esperanto.bialystok@interia.pl
Antaŭdankante
Ela Karczewska
Prezidantino de Bjalistoka Esperanto-Societo

La 22-an de januaro mortis en sia hejmo en Gland pro koratako Claude Piron, svisa interpretisto, psikoterapiisto, aŭtoro kaj esperantisto.