Sub la titoloj Studentoj aktivas aperis en la Berlina Informilo de Decembro 2000 anonco pri formiĝo de berlina studenta grupo kun la nomo Berlinaj Studentoj-Esperantistoj (BSE). En la sekva numero oni sciigis, ke la grupo renkontiĝas ĉiun dimanĉon en la "TU-loko Tel.Quel, Ernst-Reuter-Placo"".
 
Intertempe la renkontiĝejo plurfoje ŝanĝiĝis, same kiel la tempa ritmo de la renkontiĝoj.
 
Ek de kelkaj jaroj la grupo renkontiĝas en la Berlina Oficejo de Germana Esperanto-Junularo (BerO). Mi esperis, ke per la loka kontakto oni povus rekruti unu-du kunlaborantojn por BerO. Tio ankaŭ sukcesis, sed tio havis ankaŭ tiun sekvon, ke la laborhoroj de la oficejo estis ŝovitaj al la renkontiĝotempo de BSE, tiel ke inter BSE kaj la BerO-kunlaborantaro ne plu estis klara distingo.
 
Dum la pasintaj jam multaj monatoj estis konstatebla lamado de la grupa aktivado, kiu eble ne tute hazarde koincidas kun lamado en la funkciado de BerO. Tio estas des pli bedaŭrinda, ĉar ankaŭ ELB kaj GEA intencis transdoni kelkajn taskojn de siaj oficejoj al BerO.
La 1-an de Septembro BSE decidis ne plu renkontiĝi ĉiun semajnon sed jam nur sporade. La grupo informadas pri la renkontiĝodatoj en sia interna retletera dissendolisto.
 
Tiu decido tamen havas ankoraŭ pli ampleksajn sekvojn: Per la malnova decido, ŝovi la ofichorojn de BerO al la tempo de renkontiĝo de BSE, oni jam signife malplibonigis la atingeblecon kaj per tio la funkcikapablon de BerO. Per la nuna decido nuligi la regulajn BSE-renkontiĝojn oni same nuligis la tempon de garantiita atingebleco de BerO por la ekstera publiko. Oni povus nun ekdiskuti, ĉu sub tiaj kondiĉoj aparta (kaj aparte pagenda) oficejo ankoraŭ estas senchava.

Sebastian Hartwig

Sebastian Hartwig estis tiom ĝentila sendi al mi sian artikolon antaŭ la apero en la Informilo (dankon!), kaj mi kaptas la eblecon reagi. Mi volas ĝustigi kelkajn de la faktoj laŭ mia vidpunkto.
 
Nuntempe la sola kunlaboranto de BerO estas mi - kaj la BerO-laboron mi plejparte plenumas regule lunde, posttagmeze ĝis vespere. Mi decidis tamen ne publikigi tion kiel »oficejaj tempoj« - ĉar mi estas iom nekalkulebla, kaj ne povas garantii, kiam mi venas. Pro tio mi lasis oficiale la vendredajn oficejajn tempojn - tiam homoj povis telefone kaj persone atingi nin, kio sufiĉe malofte okazis kaj certe ne kaŭzis grandan ĝenon de la BSE-aj renkontiĝoj.
 
Foje mi ankaŭ vendrede venis kelkajn horojn antaŭ la BSE-tempo kaj tiam laboris. Almenaŭ dum la lasta jaro ne estis farita BerO-laboroj dum la renkontiĝoj de BSE (krom en kelkaj esceptaj okazoj, kiam mi ne tute finis antaŭ BSE kaj iuj el la BSE-anoj pretis helpi min pri io). La lamado de la grupa laboro verŝajne simile kiel la lamado de la BerO-laboro estas parte kaŭzita de la ne-plu-aktivo de Robert Weemeyer en ambaŭ - kaj certe ne de tio, ke la oficejaj tempoj estis samtempe kun la BSE-renkontiĝoj.
 
Mi mem estas la sola homo, kiu ĉeestis en la lastaj jaroj (ekde komenco de 2002) preskaŭ ĉiun BSE-renkontiĝon. (Esceptoj estis preskaŭ ĉiam nur, kiam mi estis eksterurbe - ĉe Roberto estis simile, sed li estis iom pli ofte eksterurbe kaj nun eĉ daŭre.) En la lasta tempo - speciale post la IJK - venis nur malmultegaj homoj, la 25an de Aŭgusto krom mi nur venis unu ne-BSE-ano, kaj la 1-an de Septembro mi restis sola. Tiun tagon la kunveno de BSE - do mi - decidis, ke tiel ne daŭru. Do, mi anoncis (per la BSE-dissendolisto), ke mi vendrede venos nur, kiam almenaŭ unu alia anoncos antaŭe al mi, ke li ankaŭ venos. Ĉar mi estas la persono kun la ŝlosilo, la rezulto estos, ke BSE-renkontiĝoj ne plu okazos ĉiusemajne.
 
Je mia surprizo la reagoj al tiu anonco estis pozitivaj (»jes, ni ne ĉiusemajne kunvenu«) - ne venis amase la anoncoj, ke homoj venos, la sekvan semajnon do BSE ne okazis - kaj bedaŭrinde kelkaj surprizaj gastoj ne povis renkonti nin.
 
Do, la rezulto estas, ke nun BSE-renkontiĝoj okazas nur, kiam iu krom mi ŝatas havi tiun renkontiĝon - kaj tio ankaŭ povas esti gasto.
 
Do, bonvolu anonci vin (ekz. per retmesaĝo al bse(ĉe)esperantoland.org), kaj preskaŭ certe ni kunvenos por bonvenigi vin. (Se vi proponos interesan programon, pli da homoj venos.)

Paul Ebermann

Kiam la Informila afero denove eklamis en komenco de 2006, multaj Berlinaj esperantistoj esprimis la opinion, ke papera eldono de la Informilo, eĉ se en reduktita formo, estas necesa por la reciproka informiĝo de la regionaj esperantistoj. La ekzistantaj Berlinaj kaj Brandenburgaj interretaj dissendolistoj laŭ tiuj opinioj ne sufiĉas por atingi ĉiujn samideanojn.
 
La nuna redaktoro de la Informilo interkonsentis do kun la estraro prizorgi tiun taskon ĝis la fino de 2006. Ekde Januaro 2007 estas bezonata nova redaktoro.
 
Se la Informilo vere estas necesa por la regiono, certe troviĝas unu volontulo aŭ eĉ malgranda grupo de volontuloj, kiuj transprenos la taskon kunmeti la ricevitajn informojn, fotokopii kaj forsendi ilin. Se troviĝos neniu, tiam la Informilo evidente ne estis tiel necesa kiel iuj kredis.

Sebastian Hartwig

Esperantoaranĝoj en Brandenburgio estas ne tre oftaj. Tial ni aparte ĝojis pri la iniciato de Klaus Riedel kaj aliaj Finsterwalde-anoj, aranĝi Esperanto-tagon en Finsterwalde je la 23a de Septembro kun komuna estrarkunveno de EABB kaj ELB.
 
Sabaton, la 16an de Septembro, la prezidanto de EABB, Ronald Schindler, dissendis malanoncan retleteron. Li parolas iom malklare pri »diversaj objektivaj kaj subjektivaj kaŭzoj«. La prezidanto de ELB, Peter Kühnel en retletero de la 19a de Septembro mencias »iujn stultajn miskomprenojn«. Jen ni prezentas la leteron de Ronald Schindler:
 
Karaj geamikoj,
 
bedaŭrinde mi devas hodiaŭ deklari, ke la planita ekskurso al Finsterwalde je la 23a de Septembro ne okazos pro diversaj objektivaj kaj subjektivaj kaŭzoj.
 
Pro la malmultegaj aliĝintoj la organiza komitato post longa diskuto decidis, ke tiu tre grava aranĝo ĉi-jare ne okazu en Finsterwalde. Se la steloj staras bone, ili eble estos pretaj, aranĝi la ekskurson denove sekvontjare.
 
La estraro de EABB do trovu lokon kaj daton por la sekvonta kunsido, ĉu en Berlino aŭ aliloke.
 
Sekvontfoje oni akceptu la petojn de la organizantoj kaj promesu apogon.
 
Bv. transdoni tiun ĉi informon al eblaj interesuloj, kiuj ne disponas pri interreto kaj jam kaŝe/malkaŝe diris, ke ili eventuale intencas veni al Finsterwalde.
 
Mi mem tre bedaŭras tiun ĉi disvolviĝon, sed ...
 
Samideane

Ronald Schindler
EABB, la prezidanto

La 1-an de Oktobro 2006 d-ro Ronald Lötzsch festos sian 75an naskiĝtagon.

La 14an de Aŭgusto mortis post longa malsano en aĝo de 83 jaroj la multjara membro de la estraro de ELB s-anino Eva Pollák.

Ek de 2007 forfalos la senkosta alsendo de la Informilo al interesitoj. Nemembroj povas aboni ĝin kontraŭ 5 € jare aŭ preni senkostan ekzempleron dum Ĵaŭda Rondo aŭ legi ĝin senkoste en la reto.