Ekde la fino de 2004 ekzistas en Berlino Esperanta babilrondo specife dediĉita al samtempa uzado de du ĉefaj funkcioj buŝaj: kiel esprimilo de ideoj kaj opinioj kaj ĝuilo de manĝaĵoj kaj trinkaĵoj. Ĝi do celas Esperanto-parolantojn kiuj ŝatas babiladi en leĝera, amikeca etoso ĉirkaŭ tablo provizita je frandindaĵoj, malkovrante kuirartojn el diversaj landoj. En tiu ĉi nova grupo oni parolu laŭte nur Esperanton, flustre kun siaj najbaroj - kaj pli laŭte kun la kelneraro! - oni rajtas uzi ankaŭ la germanan aŭ iun ajn alian lingvon. Tiaj renkontoj povas havi utilan kromefikon: mirigi kaj interesigi ĉirkaŭulojn pri Esperanto.
 
Ni kuniĝas ĉiumonate la lastan vendredon je la 20a horo, en ĉiufoje alia restoracio konsilita de partoprenantoj. La unuan fojon, en Septembro 2004, ni renkontiĝis en azia vegetara restoracio, poste sekvis i.a. greka, germana, tajlanda, japana, meksika.
 
Espereble tiu prezento tiklos vian intereson kaj apetiton kaj ni povos renkontiĝi multnombre por evidentigi ke eblas paroli Esperanton ankaŭ ... plenbuŝe.
Informoj pri la sekvonta renkontiĝo legeblas ĉi tie:
 
http://me.in-berlin.de/~maxnet/invito6.htm.

Philippe Beaudonnet